Qendra për informim Lajmet.com

Anashkalimi i Kosovës dhe shqipja e munguar

Nga YLBER LILI

I ngjashëm me nacionalizmin serb dhe ai maqedonas po tenton të vendosë themelet e shtetit nacional dhe etnocentrik. Kemi të bëjmë me fenomenin e nacionalizmit ekstrem, hegjemonist që synon të ngërthejë gjithçka, përfshirë dhe atë që nuk është e tyre. Nëse maqedonasit do të ishin kthjelluar nga tendenca të tilla identike me ato të serbëve nuk do të kishim fërkime, tendosje të marrëdhënieve ndëretnike, ndërnacionale dhe gjithçka do të kalonte pa patur konflikte dhe grindje. Sot e kësaj dite politika maqedonase preferon atë tradicionalen, duke shpërfillur gjithçka që ndërlidhet me shqiptarët. Maqedonasit hamenden se mund të krijojnë “laboratore” mirëbesimi, tolerance, respektimi ndaj dallimeve kulturore, fetare etnike, duke shpërfillur shqiptarët. “Kapitulli” i gushtit do të mbyllet me një forum të organizuar nga vetë presidenti maqedonas Boris Trajkovski. “Dialogu ndërmjet civilizimeve” është forumi në të cilin marrin pjesë shefat e shteteve të Evropës juglindore, përfaqësues të BE-së, përfshirë institucionet dhe organizatat joqeveritare. Siç merret vesh nga “engjëjt mbrojtës” të Trajkovskit (këshilltarët) diskutimet e forumit do të fokusohen në disa drejtime: paqja dhe stabiliteti, demokracia dhe shoqëria civile, si dhe kultura dhe dallimet. Gjithashtu ata nuk kanë hezituar të bëjnë të njohur për publikun se materiali propagandues është shtypur vetëm në maqedonisht dhe anglisht, duke përjashtuar në mënyrë kategorike gjuhën shqipe. Shpërfillja që i bëhet gjuhës shqipe është një tjetër barometër me të cilin peshohet rrekja e maqedonasve për të sfiduar shqiptarët. Për të përforcuar një gjë të tillë, të karikuar dhe nga bashkëmendimtarët e tyre serbë, në këtë forum nuk kanë denjuar që të ftojnë as presidentin e Kosovës. Në mënyrë cinike njëri nga këshilltarët e kryetarit të shtetit maqedonas ka pohuar se “kryetari i Kosovës nuk është ftuar sepse Kosova nuk është e pavarur”. Një deklaratë e tillë është verbale dhe aspak e qëndrueshme, sepse Samiti i Selanikut i cili ishte i përmasave më prestigjioze sesa ky i Ohrit, sipas filozofisë maqedone do të konsiderohej
i pavlerë! Gjithsesi anashkalimi i presidentit Rugova për ne shqiptarët nuk mbetet me “no coment”. Politika maqedone si dhe institucionet shtetërore ende nuk kanë kuptim lidhur me rregullat bazë të demokracisë. Ata mendojnë se mund të arrijnë të monopolizojnë gjithçka në favor të tyre përfshirë edhe forume. “Strategët” maqedonas nuk rreshtin së akuzuari shqiptarët, duke vlerësuar se gjoja burimi i të gjithë këqijave vjen nga Kosova. Nga ana tjetër ata i frikësohen ballafaqimit të drejtpërdrejtë në nivel takimesh. Maqedonasit tashmë e kanë humbur pusullën, në mënyrë tepër naive ata dalin në mbrojtje të interesave dhe strategjive hegjemoniste serbe. Anashkalimi i presidentit kosovar nga Shkupi zyrtar, vjen menjëherë pas tentativave serioze të kampit politik serb për ta trajtuar Kosovën si pjesë të Serbisë. Maqedonasit nuk preferojnë të prishin krushqitë e vjetra me serbët për hir të Kosovës dhe të shqiptarëve. Qëndrimet e fundit të autoriteteve shtetërore maqedonase bien në kundërshtim të plotë me frazat optimiste që vijnë nga kampi politik shqiptar, pjesëmarrës në qeverinë e Maqedonisë. Ndërsa politika shqiptare pohonte se është zgjidhur çështja e përdorimit të gjuhës shqipe, me një gjë të tillë nuk dakordohet realiteti faktik. Shefat e shteteve të Evropës juglindore nuk do të kenë mirësinë të shohin qoftë dhe një shkronjë në gjuhën shqipe. Me pak fjalë maqedonasit po na thonë troç se nuk kanë ndërmend të ndryshojnë strategjinë e tyre në raport me shqiptarët. Filozofia me të cilën udhëhiqen sllavët e jugut në raport me shqiptarët mbetet një epidemi e pashërueshme e mpleksur me nacionalizma, ekstreme. Po ashtu gjithçka mbetet në suazat e hamendjeve se më në fund shqiptarët janë të pranueshëm realisht për të qenë pjesë përbërëse në këtë shtet që prodhon pakënaqësi të vazhdueshme. As të verbërit dhe shurdhmemecët nuk do ta kishin të vështirë të nuhasnin dhe të perceptonin se çfarë në të vërtetë mendojnë dhe veprojnë maqedonasit. Në pikun e ditës ata mohojnë gjithçka që është e ndërlidhur drejtpërdrejt me ndryshimet rrënjësore të mentalitetit politik maqedonas. Shkëndijat e para se kursi politik maqedonas në mënyrë të rrufeshme po merr tatëpjetën erdhën nga qëndrimet e opozitës shqiptare, të cilët alarmuan opinionin e brendshëm dhe të jashtëm se Marrëveshja e Ohrit po nëpërkëmbet në mënyrë skandaloze. Derisa gjuha shqipe përjashtohet nga mundësia e përdorimit edhe në sytë e ndërkombëtarëve, çfarë mund të presim në nivele të tjera më të ulëta?