Qendra për informim Lajmet.com

Pse folën grekët me kaq armiqësi kundër Shqipërisë dhe shqiptarëve në Parlamentin grek

Nuk ka fare dallim ndërmjet Geqisë zyrtare e jozyrtare të kohës së helmimeve e të vrasjeve të Petro Luarasit, të Papa K. Negovanit e të tjerëve dhe Greqisë misterioze të vrasjes së Aristid Kolës e të Greqisë së BE-së me dëshirën e hapur për gllabërimin e 400 mijë shqiptarëve. Pse folën grekët me kaq armiqësi kundër Shqipërisë dhe shqiptarëve në Parlamentin grek derisa në këtë vend në të njëjtën kohë,në evenemangun e anëtarësimit të shteteve evropiane të ish- bllokut lindor në familjen e përparuar ekonomike etj. të quajtur BE , 75 milionë vetëve iu tha - mirë se erdhët në klubin e bashkuar evropian? Përgjigja nënkuptohet.Por si ka mundësi që gënjeshtra e intriga e tyre, me përmbajtje ultimate, të jetë thënë me kaq pafytyrësi, kryenecësi e me një ton ultimat të pafshehur?Përgjigja është shumë e thjeshtë.Greqia është më e lastuara në BE. Vec kësaj, atje në Greqi ndodhi hiq më pak se kryeministri i shtetit shqiptar, Nano, njeriu i vizioneve të reja grekofile. Nga 20 mijë grekë etnikë, qeveria e këtij vizionari i bëri 60 mijë. Tashti ky njeri "përzierës i shkathët i letrave" në dëm të shqiptarëve, e mori fjalën që të shkumboset për ëndrrat e ardhmërisë evropiane të shqiptarëve dhe përkitazi me ultimatumin e Athinës, pasi është marrë vesh me zotërinjtë e tij grekë, në rrethanat e kontaktet kur ka mundur të thoshte dicka, do të ketë folë me "maturi" ose shkarazi, për të lënë përshtypjen e një fajtori që e pranon heshturazi se "grekërit e Shqipërisë na qenkan në hall",me fjalë të tjera se gënjeshtrat shoviniste greke të pohuara "koincidentalisht" në parlamrntin e Athinës, duhet të ishin kuptuar për të vërteta: Nëse edhe ka thënë dicka për të treguar se gjoja e ndien veten shqiptar të sulmuar, për hirë të dinakërisë së balancuar, do të ketë pohuar, ashtu sic jemi lodhur së dëgjuari lodhur së dëgjuari edhe më parë, se reagimi i këtillë i personit numër dy në diplomacinë greke "nuk ndikon pozitivisht...ose nuk kontribuon... ose se nuk është në përputhje me synimet e përbashkëta të dy vendeve fqinje" e të ngjashme. Nuk është vetëm Nano.Grekët kanë në Shqipëri "vizionarët" e tyre shqipfolës që nuk janë të ngarkuar me "nacionalizëm shqiptar", kanë mediat e tyre të prira nga Klanite, gazeta teknikisht më e pispilosu, kanë e cka nuk kanë.

Për këtë "guxim të pafshehur" të parlamentit ne duhet t´iu jemi edhe mirënjohës grekëve. Ata e bëjnë legjitim shqetësimin tonë për kërcënimet e tyre. Ne që shqetësohemi ngaqë rrezikohemi nga planet e gllabërimit grek, të shprehur tani në mënyrë ultimate, kemi të drejtë të mobilizohemi e të përgjigjemi për t´iu kundërvënë hapave që do të pasojnë nga ata. Për njohësit e mirë të gatesave shoviniste greke, ky reagim në parlamentin grek nuk është përjashtim casti. Vite më parë, në atë lojën e presioneve mediale kundër idesë së anëtarësimit të Turqisë në BE, redaktori i rubrikës së jashtme të gazetës më autoritative suedeze "Dagens Nyheter" bëri një analizë krahasimtare shumë objektive të kritereve negative ndërmjet Greqisë dhe Turqisë, që do të duhej të paraqitnin pengesë për anëtarësim në BE.Me anë të kësaj analize përfundohej se vendin në BE e meriton Turqia para Greqisë,ose në një ndërlidhje tjetër kuptimore as njëri dhe as tjetri vend dhe se kjo e fundit e ka pa të drejtë vendin në BE, duke e cilësuar njëherit si shtetin më fashizoid brenda kësaj familjeje evropiane.

Po cka bën shteti shqiptar edhe kur sulmohet zyrtarisht!Po bën shumë, por në favorin grek dhe nuk bën fare gjë për t´u mbrojtur. Në pushtet po rri këmbëkryq partia, një segment i së cilës nuk është i ngarkuar me "nacionalizëm shqiptar", ndërkohë që është i stërngarkuarngarkuar me miqësi greke pa kritere. Në Shqipëri po vijnë shovenistë të tërbuar grekë, dhe priten sikur na e shpëtuan Kosovën, ndërkohë që e ëndërronin me një pjesë shqiptarësh të shfarosur dhe një pjesë të zbuar, që do t´ua rikujtonte suksesin e tyre në Camëri. Po vijnë zyrtarët grekë e na thonë se shqetësimi shqiptar për Ligjin grek të luftës iu dukeshka e qenkësh qesharak,kurse zyrtarët tanë tundin kokën të kënaqur, gazetat tona heshtin ose vetëm e regjistrojnë këtë pohim skajshmërisht cinik, me përjashtim të rrallë të ndonjë individi të indinjuar që vjen me ndonjë shkrim kritik të vetmuar i cili mbetet në harresë. Arat, livadhet, shtëpitë shqiptare në Camëri rrijnë të zaptuara nga grekët, Shqipëria zyrtare hesht, me pretekstin e parë në majë të gjuhës se po të themi dicka, grekët na hakmerren e na i dëbojnë shqiptarët që janë me punë atje.Shqiptarët, ose arvanitasit autoktonë, disa qindra mijë, ose milionë atje në Greqi, kanë frikë të deklarohen se cka janë.Në greqi "nuk ka as turqë".Një Greqi e pastër etnikisht, por me meritë të ndytësirës fondamentaliste ortodokse e të ultrashovenizmit grek. Shqipëria shtet hesht. A e ka shtruar ndonjëherë Shqipëria e sotme socialiste në ndonjë takim dypalësh dhe ndërkombëtar se me cfarë të drejte dhe me cfarë qëllimesh po ua ndërron emrat shqiptarëve Greqia zyrtare? êshtë kënaqësi kur dëgjojmë se komisione përkatëse brenda BE-së merren me përpilimin e ligjeve dhe masave për trajtimin humanitar të kafshëve.

Një hap i mrekullueshëm. Dua ta di nëse Be-ja ka lëvizur ca buzët për të thënë ndonjë vërejtje në adresë të Greqisë se ndërrimi i emrave personal me ndërhyrje të shtetit është një ndërmarrje cnjerëzore dhe poshtëruese. Me këtë goditet e shpërfillet dinjiteti njerëzor, të mos flasim për dinjitetin kombëtar se mos po na i marrin për nacionalizëm. Ëndrrat e Evropës pa kufi janë të këndshme, por Evropa demokratike duhet të vendosë kufi të brendshëm deri ku mund të tolerohen shkeljet e këtilla të të drejtave njerëzore që janë imanencë,ose ngërthyese edhe e të drejtave kombëtare.Nuk ka dëgjuar BE-ja për këto shkelje? Një mendimtar pat thënë se njerëzit kanë qejf të jenë të mashtruar kur u shkon për shtati. Një tjetër pat pohuar se fajtorë për të këqiat e sjellësit e fatkeqësive nuk janë shpirtzinjtë, por ata që heshtin para tyre. Nëse dikush "nuk di" se përse po vepron Greqia kështu, duhet t´i thuhet se me "konvertimin"në greke të emrave të 400 mijë shqiptarëve ajo do që të shartojë 400 mijë grekë në trupin shqiptar. Mundësitë e manipulimit pastaj me këtë numër enorm janë të shumta, sipas qejfit e muhabetit, që një ditë pastaj të thuhet se këta "grekër" kanë edhe tokën e vet , së cilës ndryshe i thonë edhe territor, i cili afër mendsh se iu takon atyre - grekëve dhe grekët i takojnë e janë pjesë e pashkëputshme e Greqisë. Me sa të drejtë dhe për cfarë qëllimesh i "favorizon"shqiptarët e fesë ortodokse Greqia zyrtare në procedurën e dhënies së vizave? Me sa të drejtë i ngarkon shtetasit shqiptarë Greqia zyrtare e marrëdhënieve të mira me qeverinë,por poshtëruese për popullin tonë, me taksat rreth 1000 EURO për një vizë? A ka thënë gjë botërisht Shqipëria e sotme socialiste për këto masa "miqësore"?Shqipëria nuk ka ndër mend të thotë gjë. Ahere puna u mbetet mediave, nëse ka të tilla që nuk janë zëdhënëse të segmentit të nanistëve në pushtet. Gjërat duhet të emërohen drejt, pa patur nevojë për shtrembërime.

Druajtja se po t´i përgjigjemi e kundërvihemi Greqisë me impulse adekuate në mediat tona ahere kjo do të rezultojë me pasoja të padëshirueshme të cilat më tej do të ndikonin të keqësohej situata ndërmjet dy vendeve a në rajon, është imagjinare dhe e dëmshme. Mos duhet që gjithmonë të heshtim kur na sulmojnë nga pozicionet e tërbimeve ultranacionaliste për hirë të një absurditeti, që tentohet të sqarohet e arsyetohet në mënyrë të ndryshme imagjinare.por kurrë objektive. Të marrim mësim nga e kaluara e të tjerëve.

Japonia jeton me dinjitet të lartë kombëtar që nga koha kur vendosi t´i kundërvihet ekspansionizmit rusomadh. Para kësaj mbytej në ndjenjën e inferioritetit. Cila etikë, cili parim, cili efekt, cila perspektivë e cila mbarëvajtje ndërshtetërore e rajonale e më gjerë mbrohet e shpëtohet me kësi heshtjesh, qoftë nga ana e faktorit brendashqiptar, ose e atyre në Evropë e më gjerë, nëse e kanë këtë heshtje pa të keq. Heshtja është e dobishme, por jo gjithmonë. Aq më keq që heshtja me dashje trajtohet edhe si mencuri e virtyt i mirësjelljes së përgjithshme, ashtu sic trajtohej në Kosovë pas 81.

A nuk ka forcë Shqipëria për të konfirmuar dhe afirmuar realitetin pozitiv të minoritetit grek në Shqipëri? Greqia, fqinja e dyshimtë, e ka kryer një pjesë të mirë të punës dhe hallkat e ekspansionit i ka mbërthyer mirë në gjymtyrët shqiptare. Në Tiranë, në Prishtinë e në Shkup janë instaluar iluzionistët e Evropës pa kufi në dëm të shqiptarëve. Nuk ka kufi të fshirë, por ka burokraci gati të fshirë në kufinjtë e brendshëm të mirëseardhjes së njerëzve e të qarkullimit të lirë të kapitalit etj. Këta iluzionistë shqiptarë, që dikur përqafonin integrimin në internacionalizmin proletar, janë të mirëseardhur në iluzionin e kufijve të brendshëm europian ngaqë punojnë kundër integrimit (ndërlidhjes) real shqiptar. Uniformat e uniformitetet i kanë në gjak e në tru. Nëse mendojnë që nuk do të ketë kufij të brendshëm europian e kanë gabim. Vetëm shteti me ndihmën e dhunës së mbështetur në ligj mund të garantojë sigurinë e shtetasve të vet. Nëse nuk besojnë le të marrin udhën për në Skandinavi me makinë. Kur të vijnë te urra që lidh Danimarkën me Suedinë, po të jenë të etshëm, le të pijnë një birrë dhe le të marrin përsëri të ngasin makinën për të vazhduar për Suedi.

Po rastisi që kjo t´i bie në sy ndonjë polici danez, ai do të thotë - ju bëftë mirë! Mirëpo, po i ra në sy kjo shuajtje e etjes me birrë ndonjë qytetari suedez, ai do të nxitojë pak që të mbërrijë te këmba e fundit e urrës. atje ku është kufiri i hyrjes në Suedi. Ai rastin do ta paraqesë në policinë e kufirit, jo për të kontrolluar pasaportën por prezencën e alkoolit në gjak. Ai, polici suedez nuk do të thotë të bëftë mirë birra, por mirupafsh me patentën për një kohë të gjatë dhe të bëftë mirë kjo ngarje me makinë deri këtu. Do të marrë celësat për të bllokuar makinën, ngase ai që ka pirë edhe vetëm një birrë, rrezikon jetën e qytetarëve në rrugë. Ja roli i kufirit dhe i shtetit që mbron sigurinë e shtatasve të vet. Iluzioni i fshirjes së kufijve është një kristal i bukur.

Nexhat Kita

Sqarim: Reagimi ka të bëjë me ndërmarrjen greke në Parlamentin e tyre në kohën e mbajtjes së evenemangut për pranimin e shteteve - anëtare të reja në BE.Zv.ministri i jashtëm Loverdos mbështeti si të vërteta pohimet në formë pyetjeje të një delegati të partisë opozitare Demokracia e Re se në Shqipëri po shkilen "të drejtat e 400 mijë" grekëve dhe se respektimi a sigurimi i të drejtave të tyre do të jetë kushti grek ndaj Shqipërisë për të ëndërruar edhe më tej që të bëhet anëtare e BE, por duke e ndërlidhur me Mbledhjen e Ohrit për kufijtë në Ballkan sipas shembëlltyrës së kufijve të brendshëm europian.