Qendra për informim Lajmet.com

Problemet në UT po marrin rrugëzgjidhje

Marrëveshja – premtim që duhet të përmbushet

Më shumë studentë të UT-së thonë se "me angazhimin e drejtpërdrejtë të partisë shqiptare në pushtet, veçanërisht me nënshkrimin e kësaj marrëveshjeje nga vetë Ali Ahmeti, çështja e zyrtarizimit të Universitetit të Tetovës po merr qasjen e merituar".- Këshilli i Studentëve vlerëson se Marrëveshja ndërmjet BDI-së dhe strukturave jolegjitime të UT-së "nuk ka marrë parasysh kërkesat bazë të lëvizjes studentore -largimin me çdo kusht të Fadil Sulejmanit nga objekti i Universitetit të Tetovës, kthimin e menjëhershëm të Ramiz Abdylit në postin e rektorit dhe zhvillimin e reformave të brendshme e zyrtarizimin e UT-së sipas Projektpropozimit të përpiluar nga Ramiz Abdyli".- Këshilli i Studentëve megjithatë jep afat të arsyeshëm kohor për nismën për zyrtarizim të UT-së.- Burime nga UT megjithatë thonë se pikënisje në inicimin e legalizimit të UT-së do të jetë Projekti i përgatitur nga prof.dr.Ramiz Abdyli

Nexhbedin SHAQIRI

Senati i Universitetit të Tetovës ka miratuar vendimin për krijimin e një komisioni, i cili do t’i zhvillojë negociatat me Qeverinë e Maqedonisë për zyrtarizimin e këtij universiteti. Ky komision përbëhet nga Grupi inicues, Grupi i ekspertëve, përfaqësues të studentëve dhe përfaqësues ndërkombëtarë. Prof.dr. Nexhmedin Beadini, i cili tani është u.d. rektor i UT, do të kryesojë me Grupin inicues. Ky grup ka edhe tre anëtarë tjerë: doc.dr. Zehra Hajrullahu, mr.sc. Naser Ademi dhe mr.sc. Fatmir Besimi. Në cilësinë e ekspertëve do të jenë: prof.dr. Edmond Beqiri dhe prof.dr.Blerim Reka. Në këtë komision studentët e UT-së do t’i përfaqësojë Shkodran Idrizi. Komisionin negocues e përbëjnë edhe dy përfaqësues të Bashkimit Evropian, njëri do të jetë si ndërmjetës, ndërsa tjetri si lehtësues. Krijimi i këtij komisioni ka përjashtuar të dy personat të cilët kohën e fundit ishin objekt i diskutimeve të ndryshme. Udhëheqja e UT-së ka deklaruar se krijimi i këtij komisioni ka ardhur si rezultat i takimeve të shumta me partinë shqiptare në pushtet, BDI-në. Kryesuesi i Komisionit negocues, Nexhbedin Beadini, e ka vlerësuar këtë marrëveshje si historike, pasi për herë të parë çështja e zyrtarizimit të UT-së shtrohet në këtë mënyrë. Duket se është gjetur mënyra për parandalimin e konflikteve në UT, që njëkohësisht duhet të përshpejtojë zgjidhjen e çështjes së këtij universiteti.

Këshilli i studentëve ka ndërprerë protestat e tyre për reformimin e brendshëm të UT-së, respektivisht kthimin e prof.dr. Ramiz Abdylit në postin e rektorit, ndërsa kryetari i Bordit, Fadil Sulejmani, është pajtuar me arritjen e marrëveshjes për krijimin e një Komisioni negociues me qeverinë e Maqedonisë.

Këshilli i studentëve skeptik, por pret rezultatet e Marrëveshjes

Lëvizja studentore “Marsi i Studentëve”, e drejtuar nga “ Këshilli i studentëve të UT-së", aktivitetet e veta i konsideron si tejet të suksesshme. Përpjekjet e Lëvizjes për reformimin e brendshëm të UT-së, si dhe hapja e rrugës për zyrtarizimin e këtij institucioni, kanë pasuar me arritjen e një marrëveshje në mes BDI-së dhe strukturave jolegjitime të UT-së, vlerëson Këshilli i studentëve. Ata distancohen nga kjo marrëveshje, për arsye se "nuk janë respektuar disa kërkesa të tyre".

Këshilli vlerëson se Marrëveshja ndërmjet BDI-së dhe strukturave, siç thotë, jolegjitime të UT-së, nuk kanë marrë parasysh kërkesat bazë të Lëvizjes studentore -largimin me çdo kusht të Fadil Sulejmanit nga objekti i Universitetit të Tetovës, kthimin e menjëhershëm të Ramiz Abdylit në postin e rektorit dhe zhvillimin e reformave të brendshme e zyrtarizimin e UT-së sipas – Propozimprojektit të përpiluar nga Ramiz Abdyli.

“Këshilli i studentëve “ nuk ka qenë i konsultuar gjatë arritjes së marrëveshjes. Gjithashtu ky këshill nuk ka as përfaqësuesin e vet nga radhët e studentëve dhe pedagogëve në komisionin e themeluar. Duke shtruar "mosrespektimin e kërkesave të tyre", Këshilli i studentëve ka rezerva dhe dyshime të mëdha në cilësinë, autoritetin dhe vizionin e anëtarëve të propozuar nga strukturat e ish-rektorit Fadil Sulejmani. Ky këshill mohon legjitimitetin vendimmarrës të organit që ka zgjedhur Komisionin nismëtar. “Këshilli i studentëve” vlerëson se duke mos dashur të mbajë përgjegjësi për rrjedhën e aktiviteteve të mëtejme në drejtim të legalizimit të UT-së, pavarësisht nga fakti që reformat e brendshme ngelin të parealizuara, ky këshill ka marrë vendim që të ndërpresë aktivitetin e mëtejmë për një periudhë të papërcaktuar, në shenjë të vullnetit të mirë në mënyrë që Komisioni nismëtar ta realizojë objektivin që e ka marrë përsipër. Në rast të mosrealizimit të marrëveshjes në fjalë, në një afat të arsyeshëm Këshilli i studentëve do t’i llogaris përgjegjës nënshkruesit e marrëveshjes dhe në të njëjtën kohë do të riaktivizojë procesin e ndërprerë të protestave, me qëllim të, siç thuhet, "realizimit të suksesshëm të aspiratave të studentëve".

Marrëveshjen e arritur ndërmjet udhëheqjes së UT-së dhe BDI-së, Këshilli i studentëve e konsideron si rezultat të protestave të tyre. Mirëpo ata thonë se "qëllimi ynë ka qenë që të mos futemi në fazën e legalizimit të Universitetit pa u bërë reformimi i brendshëm i tij, për shkak se ajo do të kishte më shumë sukses sesa tani siç është bërë. Marrëveshjen në fjalë, Këshilli e konsideron si një marrëveshje të nënshkruar me strukturat jolegjitime të UT-së".

Anëtari i Këshillit të studentëve të Universitetit të Tetovës, Servet Jusufi, theksoi se "në takimin me liderin e BDI-së, Ali Ahmeti, kemi kërkuar rezultatet nga pesë pikat që ai ka premtuar, për t’i realizuar kërkesat tona. Ata na e paraqitën Marrëveshjen tanimë të njohur, ndërmjet udhëheqjes së UT-së dhe BDI-së. Në takimin që patëm, ne shtruam vërejtjet tona për atë, mirëpo ata thirren në emër të zyrtarizimit dhe tani ne do të presim nëse vërtet do ta bëjnë këtë. Në Marrëveshjen e nënshkruar që ka të bëjë me fillimin e negociatave për zyrtarizimin e UT-së, nuk është përcaktuar ndonjë afat kohor për realizimin e këtij objektivi.

Anëtari i Këshillit të studentëve, Servet Jusufi, thotë se "në një afat të arsyeshëm kohor, atëherë kur ne do të konsiderojmë se Marrëveshja nuk është duke u realizuar dhe çështja e zyrtarizimit të Universitetit nuk shkon ashtu siç duhet, ne do të riaktivizojmë sërish protestat e studentëve". Ne, thotë Serveti, jemi angazhuar që të bëjmë reformimin e brendshëm të UT-së dhe pas kësaj faze të fillohet me fazën e dytë, që do të kishte të bënte me zyrtarizimin e UT-së.

“Kjo marrëveshje tani është e përshpejtuar për ne dhe pamundësoi reformimin e brendshëm në Universitet dhe njëkohësisht edhe procesin e legalizimit, që ne mendojmë se është i parakohshëm”. Sa i përket reformimit të brendshëm të Universitetit, Këshillit të studentëve i është premtuar se ky reformim do të bëhet paralelisht me zyrtarizimin. Sa u përket vërejtjeve të Këshillit rreth Marrëveshjes, ata thonë se "ne kemi të drejtë për këtë, por njëkohësisht u lëmë hapësirë që ata të veprojnë. Me këtë ua lëmë njëkohësisht edhe përgjegjësinë për sukseset dhe dështimet e ardhshme". Vlerësimet e Këshillit të studentëve janë se Universiteti i Tetovës, tani për tani nuk e ka personin meritor i cili do të drejtonte negociatat për zyrtarizimin e tij. Ata thonë se tani kemi një ushtrues detyre dhe jo një rektor i cili do të ishte legjitim për të dhënë vulën rreth marrëveshjeve të ardhshme për procesin e legalizimit të Universitetit.

Në komisionin e caktuar për zhvillimin e negociatave për zyrtarizim, Këshilli i studentëve të UT-së nuk ka përfaqësues. Për këtë, përfaqësuesi i këtij Këshilli, Servet Jonuzi, thotë se "nuk është aq i madh interesi ynë për të pasur një anëtar në këtë komision, kur dihet se qëllimet tona kanë qenë të pastra , prandaj nuk duam që të njollosemi në këtë Komision , pasi që jemi shumë skeptikë rreth sukseseve të këtij komisioni" (?!) Këshilli i studentëve është i njohur me projektin e prof.dr. Ramiz Abdylit për zyrtarizimin e UT-së. Sipas marrëveshjes , Komisioni i formuar ka për detyrë që të elaborojë një projektplan, në bashkëpunim me Ministrinë e Arsimit dhe bashkësinë ndërkombëtare për legalizimin e UT-së.

Këshilli i studentëve vlerëson se hartimi i një projektplani të këtillë, do të thotë kthim mbrapa, derisa tani e kemi atë nga ish-rektori Ramiz Abdyli. Këshilli i studentëve thotë se le t'i jepet shansi Ramiz Abdylit dhe projektit të tij për zyrtarizim dhe ta dëshmojë veten. Këshilli i studentëve ka kërkuar që si drejtues i bisedimeve në këtë komision të jetë Ramiz Abdyli dhe një vend të jetë për Këshillin e studentëve , si lëvizje studentore e cila ka merita të mëdha për vënien në lëvizje të çështjes së zyrtarizimit të UT-së. Këshilli i studentëve të UT-së thotë se tani kemi një marrëveshje të nënshkruar nga të dy palët, prandaj që të mos akuzohemi si faktorë destabilizues, që nuk ia dëshiron të mirën legalizimit të Universitetit, ne u japim një shans bisedimeve dhe atyre të cilët e morën përsipër që këtë proces ta avancojnë.

Këshilli i studentëve thotë se përkrah projektin e Ramiz Abdylit, për çështjen e zyrtarizimit të UT-së. Udhëheqja e këtij Universiteti ka akuzuar atë se nuk përfillë normat statutore të UT-së, duke iu shmangur njëkohësisht edhe aktit të themelimit që ka të bëjë me zyrtarizimin e tij. Këshilli i studentëve thotë se ne këmbëngulim që zyrtarizimi i UT-së të bëhet sipas aktit të themelimit. Ne, thonë ata, nuk kemi dijeni nëse projekti i Ramiz Abdylit devijon nga ky akt, prandaj edhe do ta kërkojmë. Këshilli i studentëve thotë se ne kemi pasur takime me Ramiz Abdylin , por ato kanë qenë takime pune dhe nuk janë bërë të njohura për opinion. Ai i ka mbështetur kërkesat tona pa u inkuadruar në punën tonë, ndërsa studentët kanë zhvilluar rrjedhën e aktiviteteve. Në ditën e dytë të protestave para studentëve paraqiten edhe profesore të cilët kanë qenë të larguar nga Universiteti. Këshilli i Studentëve këtë e konsideron si pjesëmarrje të qytetarëve shqiptarë që ia dëshirojnë të mirën këtij Universiteti.

Anëtari i Këshillit, Servet Jonuzi, tha se ne nuk kërkojmë që grupi i profesorëve të përjashtuar të kthehet ashtu siç janë përjashtuar dhe të zëvendësojnë këta profesorë që janë. “ Ne mendojmë se Universiteti i Tetovës ka shumë profesorë që meritojnë të jenë aty, prandaj vetë institucioni i konkursit do të arrijë që ta zgjidh këtë problem”. Sa i përket manipulimit me studentët të grumbulluar rreth Këshillit studentor, Servet Jonuzi thotë se nuk ka implikime të atilla. Ai thotë se ne jemi të vetëdijshëm se nga kjo lëvizje do të përfitojnë persona të caktuar dhe individë, të cilët nuk kanë qëllime të pastra, megjithatë shpirti i pastër i studentëve do të triumfojë ndaj atyre njerëzve të cilët dëshirojnë të implikohen dhe të përfitojnë.

Studentët shpresojnë në angazhimet e Ali Ahmetit

Studentët e Universitetit të Tetovës shikuar në përgjithësi , Marrëveshjen e arritur e konsiderojnë si një hap shumë të rëndësishëm drejt zgjidhjes përfundimtare të statusit të këtij Universiteti. Ata vlerësojnë se një qasje serioze është dashur të bëhet shumë më herët, në mënyrë që të parandalohej çdo keqpërdorim, pasojat e së cilës i ndiejnë studentët. Disa nga studentët mendojnë se Marrëveshja e arritur ndërmjet BDI-së dhe udhëheqjes së UT-së është një premtim serioz për tejkalimin e situatës së krijuar. Ata thonë se nëse kësaj here nuk ndodh asgjë në të mirë të këtij Universiteti, atëherë gjendja mund të rëndohet edhe më tepër. Te studentët si zakonisht ekziston një ekuilibër i brendshëm, ata janë të ndjeshëm ndaj dallimeve që shpesh i radhisin në taborrë të ndryshëm. Disa nga studentët thonë se me angazhimin e drejtpërdrejtë të partisë shqiptare në pushtet, veçanërisht me nënshkrimin e kësaj Marrëveshje nga vetë Ali Ahmeti, çështja e zyrtarizimit të Universitetit të Tetovës po merr qasjen e merituar. Deri më tani, thonë ata, përveç premtimeve, nuk ka pasur veprime konkrete nga partitë e mëparshme shqiptare që kanë qenë në pushtet. Një student i këtij universiteti thotë se Marrëveshja e nënshkruar përbënë një harmonizim të përpjekjeve për legalizimin e UT-së. Ai thotë se lideri i BDI-së, Ali Ahmeti, me nënshkrimin e tij, merr një përgjegjësi shumë premtuese për fatin e këtij universiteti i cili tanimë është bërë edhe fati i mijra studentëve. Disa nga studentët mendojnë se e gjithë kjo ndoshta nuk është e rastësishme dhe se partia shqiptare në pushtet, me angazhimin konkret të saj do ta zyrtarizojë Universitetin e Tetovës.

Burime nga Universiteti i Tetovës gjithashtu thonë se bazë për nismën për legalizim të Universitetit të Tetovës do të jetë Projektplani i përgatitur nga prof.dr.Ramiz Abdyli, deri kohë më parë rektor i Universitetit të Tetovës dhe shtojnë gjithashtu se anëtarët e Komisionit nga brenda UT nuk janë përfshirë në Komision në bazë të funksioneve, por vetëm si përfaqësues të mësimdhënësve që punojnë në UT.

------------------------------------------------------------------------
Marrëveshje në mes Bashkimit Demokratik për Integrim dhe strukturave gjegjëse të Universitetit të Tetovës për legalizimin e Universitetit të Tetovës

1. Parimet themelore

1.1 Duke u nisur nga synimi ynë i kahmotshëm dhe përcaktimi ynë i përbashkët për të zgjidhur çështjen e shkollimit të lartë të shqiptarëve të Maqedonisë, në mënyrë që ai të reflektojë interesin publik të të gjithë qytetarëve dhe të përmbushë nevojat e popullatës shqiptare në mënyrë përmbajtësore dhe kualitative konform standardeve universitare;

1.2 Duke u nisur nga fakti se tani më një kohë të gjatë nuk u realizua legalizimi i UT si institucion arsimoro-shkencor, i cili u themelua për të përmbushur nevojat e shqiptarëve për shkollim universitar, e drejtë kjo e trashëguar dhe e garantuar nga dispozitat kushtetuese dhe ligjore;

1.3 Duke konstatuar se të gjitha masat e ndërmarra në këtë drejtim gjer më tani (nga institucionet ekzistuese në RM) nuk përmbushin kërkesat dhe nevojat e qytetarëve shqiptarë për arsim të lartë;

1.4 Bazuar mbi parimin i cili shkollimin universitar e konsideron si vlerë publike e cila gjithmonë do të mbetet përgjegjësi publike;

1.5 Duke respektuar dhe pasur në konsideratë të gjithë ata që në mënyra të ndryshme deri më tani kontribuan për zgjidhjen dhe afirmimin e kësaj çështjeje arsimore dhe humane;

2. Komisioni nismëtar

Duke u nisur nga këto parime themelore, U ARRIT MARRËVESHJE në mes Bashkimit Demokratik për Integrim dhe strukturave gjegjëse të Universitetit të Tetoves ( UT ), për krijimin e komisionit nismëtar për legalizimin e UT-së në përbërje:

1. Prof.Dr. Nexhmedin Beadini / kryesues
2.Doc.Dr. Zehra Hajrullahu
3. Mr.sc. Naser Ademi / anëtar
4. Mr.sc. Fatmir Besimi / anëtar
5. Shkodran Idrizi /student
6. Prof. Dr. Edmond Beqiri / ekspert
7. Prof. Dr. Blerim Reka / ekspert

Komisioni në fjalë do të punojë dhe ndërmarrë të gjitha hapat e nevojshme për legalizimin e Universitetit te Tetovës si Institucion arsimor-shkencor.

Komisioni në fjalë fton të gjithë arsimdashësit, studentët, profesorët si dhe ekspertët dhe përfaqsuesit ndërkombetarë të ndihmojnë dhe mbështesin këtë komision në punën e tij.

Ky komision do të bazojë punën e vet në idenë e realizimit të legalizimit të një institucioni publik arsimoro-shkencor (Universitetit të Tetovës) në gjuhën shqipe, bazuar mbi norma dhe standarde që do të garantojnë njohjen e këtij institucioni jo vetem ne Republikën e Maqedonisë por edhe në rrafshin ndërkombëtar.

Nderkohë, Universiteti i Tetovës do të udhëhiqet nga Komisioni Nismëtar për Legalizimin e UT-së.

3. Strategjia dhe parimet udhëheqëse të Komisionit Nismëtar

Komisioni Nismëtar për Regjistrimin/Legalizimin e Universitetit të Tetovës përbëhet nga :

1. Prof.Dr. Nexhmedin Beadini / kryesues
2.Doc.Dr. Zehra Hajrullahu
3. Mr.sc. Naser Ademi / anëtar
4. Mr.sc. Fatmir Besimi / anëtar
5. Shkodran Idrizi /student
6. Prof. Dr. Edmond Beqiri / ekspert
7. Prof. Dr. Blerim Reka / ekspert

Komisioni ka për detyrë të elaborojë një projekt/plan në bashkëpunim me Ministrinë e Arsimit dhe Komunitetin Nderkombetar. Projekt/plani, i bazuar në interesat e studentëve si interesa primare të projektit, ka për qëllim zhvillimin e arsimit sipëror në gjuhën shqipe të një kualiteti të lartë, të finansuar nga shteti dhe te bazuar në standarde ndërkombeëare që garantojnë njohje të diplomave dhe procesit mësimor në suaza nacionale dhe internacionale.

Puna e Komisionit Nismëtar do te bazohet ne keto parime:

- Regjistrimin e UT/së si nje institucion legal në Republiken e Maqedonisë;
- Aktivitetet do të bazohen në ligjin ekzistues për Arsim të Lartë i cili duhet ndryshuar ku ka nevojë;
- Në standardet, normat dhe konventat arsimore ndërkombëtare;
- Në bashkëpunim dhe përkrahje të plotë me Komunitetin Ndërkombëtar;
- Në obligimin e Republikës së Maqedonisë për të siguruar mjete adekuate për arsim sipëror në gjuhën shqipe.
- Në parimet e Marrëveshjes Kornizë të Ohrit që kërkon sigurim të mjeteve buxhetore për arsimimin universitar në gjuhën shqipe;

Komisioni Nismëtar do të elaborojë studime të detajuara dhe strategji gjegjëse që përfshijnë çështjet si vijon:

- një pasqyrë dhe vlerësim ekonomik të gjendjes (status quo) të tanishme (numrin actual të studentëve, numrin e të diplomuarve, koston e tashme, kërkesat në tregun e punës, etj.) të UT-së;
- analizë të nevojave dhe propozime për fakultetet të cilat do të bashkë/financohen nga shteti;
- identifikimin e adaptimeve të nevojshme në Ligjin për arsim universitar,
- kalkulimet financiare të kostos, planifikim afatmesëm dhe konceptin për grumbullimin e fondeve;
- ngritjen(avansimin)/njohjen e programit për studentët e diplomuar në Universitetin e Tetovës;
- zhvillimin e programeve për bashkëpunim me institucionet e tjera universitare në vend, rajon dhe në nivel ndërkombëtar;
- programe zhvillimi dhe perfeksionimi për kuadrot akademike dhe një program punësimi/ri-trajnimi për kuadrot e tanishëm, etj.

Dispozitat përmbyllëse

- Palët nënshkruese obligohen që të qëndrojnë në parimet e dakorduara duke pasur parasysh interesin e lartë shoqëror dhe kombëtar për legalizim të UTsë;
- Obligohen që komunikimin me mediat ta bëjnë në bazë të marrëveshjeve paraprake të të dy palëve;
- Obligohen që të konsiderojnë këtë tekst si tekst të vetmin autentink dhe bazë për të ecur përpara në drejtim të legalizimit të UT-së.

Tetovë, 17.03.2003

Për BDI Për UT
Ali Ahmeti Dr. Nexhbedin Beadini

-----------------------------------------------
Aziz Pollozhani, ministër i Arsimit dhe i Shkencës: Hap i guximshëm dhe tejet shpresëdhënës

Marrëveshja – hapje e rrugës për realizimin efektiv të një qëllimi të kahmotshëm për një zgjidhje më përmbajtësore për arsimin e lartë të shqiptarëve. Mendoj se në këtë mënyrë mund të jetësohen dhe të përligjen qëllimet sublime të shumë atyre që kontribuan në themelimin, në punën dhe në mbarëvajtjen e aktiviteteve të Universitetit të Tetovës

Ministri i Arsimit dhe i Shkencës i Maqedonisë, dr.Aziz Pollozhani, i përgjigjet pyetjes së LOBI-t se si e komenton ai si udhëheqës i kësaj ministrie Marrëveshjen e BDI-së dhe strukturave të UT-së për formimin e një Komisioni që do të marrë nismën për legalizimin e UT dhe të punës së tij dhe thotë:

"Është për t'u përshëndetur hapi i guximshëm dhe tejet shpresëdhënës , i bërë nga nënshkruesit e dokumentit, i cili në fakt hap rrugën për realizimin efektiv të një qëllimi të kahmotshëm për një zgjidhje më përmbajtësore për arsimin e lartë të shqiptarëve.

Mendoj se në këtë mënyrë mund të jetësohen dhe të përligjen qëllimet sublime të shumë atyre që kontribuan në themelimin, në punën dhe në mbarëvajtjen e aktiviteteve të Universitetit të Tetovës.

Aktiviteti i ndërmarrë, bazuar në parimet e cekura edhe në dokumentin e nënshkruar, mendoj se është bazë e mirë që Komisioni i krijuar të arrijë deri te qëllimi i dëshiruar dhe i përcaktuar nga nënshkruesit.

Ministria e Arsimit pa dyshim se është e hapur për konsolidimin e aktiviteteve të këtij lloji dhe do të mbështesë hapat në këtë drejtim, jo vetëm si përcaktim programor i BDI-së, por edhe si obligim ligjor për të mbështetur një zgjidhje që buron nga përgjegjësia publike për tejkalimin e kontesteve të tilla në të mirë të të gjithë qytetarëve të Maqedonisë dhe pa dyshim në të mirë të arsimit si vlerë universale njerëzore". (b.s.)

-----------------------------------------
Sasho Çollakovski, zëdhënës i Qeverisë:
Nismat legale e legjitime do të shqyrtohen

Zëdhënësi i Qeverisë, Sasho Çollakovski, i pyetur nga "Lobi" se cili është qëndrimi i Qeverisë lidhur me nënshkrimin e marrëveshjes ndërmjet Bashkimit Demokratik për Integrim dhe strukturave të Universitetit të Tetovës për nismën për legalizim të UT-së, thotë:

"Qeveria, nëpërmjet Ministrisë së Arsimit, është e gatshme që ta shqyrtojë çdo nismë legale dhe legjitime, të kaluar nëpër institucionet shtetërore." (b.i.)