Qendra për informim Lajmet.com

[/bar.htm]

Komunikatë

Bashkimi Demokratik për Integrim, më datë 09 shtator 2003 mbajti mbledhjen e Kryesisë në të cilën u shqyrtua situata e krijuar në vend pas intervenimit policoro- ushtarak në malësinë e Shkupit. Në këtë mbledhje morën pjesë edhe deputetët, ministrat dhe zëvendës ministrat e kësaj partie. Me këtë rast, kryesia qëndrore e BDI-së mori këto qëndrime:

Bashkimi Demokratik për Integrim, si bartës i programit politik të ish Ushtrisë Çlirimtare Kombëtare, inicues dhe projektues i reformave të vërteta të sistemit kushtetues- juridik dhe shoqëror të Republikës së Maqedonisë, ka insistuar dhe insiston që këto reforma të bazuara në Marrëveshjen Kornizë të Ohrit, të realizohen në mënyrë thelbësore dhe pa hezitim. Të vetëdijshëm se do të ndeshemi me struktura regresive, BDI-ja vazhdimisht ka potencuar dhe këmbëngulur tek partneri i koalicionit, që reformat janë të domosdoshme për të stabilizuar vendin dhe për ta rehabilituar nga konflikti i vitit 2001.

Prioritet për BDI-në kanë pasur dhe kanë reformat e sistemit të sigurisë dhe mbrojtjes si segmente kyçe dhe të ndjeshme për shtetin. Fatkeqësisht, ngjarjet e fundit po dëshmojnë se ky proces nuk zhvillohet në përputhje me nevojat dhe kërkesat e vendit. Insistimi i vazhdueshëm i kuadrove të BDI-së nëpër institucione ka qenë dhe mbetet pikërisht ristrukturimi i këtyre segmenteve. Kemi qenë të vetëdijshëm se ne me partnerin tonë në koalicion në rrethana të jashtëzakonshme, na nevojitet angazhim këmbëngulës për të sfiduar të gjitha obstruksionet që për fat të keq, veprojnë në kuadër të strukturave të pushtetit.

Bashkimi Demokratik për Integrim është i vendosur, ka potencial njerëzor dhe nuk i mungon guximi për të përmbushur me besnikëri obligimet e marra karshi popullatës dhe për ti realizuar ato deri në fund. Në këtë rrugë ne hecim sëbashku me komunitetin ndërkombëtar- NATO, SHBA dhe BE, të cilët janë të përkushtuar për jetësimin e plotë të Marrëveshjes së Ohrit, dështimi i të cilës do të thotë edhe mosekzistim i mëtejmë i Maqedonisë si shtet.

Incidentet e fundit ndodhin në prag të fillimit të bisedimeve në mes Prishtinës dhe Beogradit për pavarësimin e Kosovës, në kohën e miratimit të ligjeve më të rëndësishme që dalin nga Marrëveshja e Ohrit, si dhe bashkëpunimit të intensifikuar të shteteve nënshkruese të Kartës së Adriatikut. Ne konsiderojmë se këto procese kanë provokuar dhe kanë vënë në lëvizje kundërshtarët e zgjidhjes përfundimtare të çështjes shqiptare në Ballkan. Qëllimet e këtyre strukturave antireformiste, antidemokratike dhe antishqiptare të mbetura nga UDB-ja janë ndarja e Kosovës, mosekzistimi i Maqedonisë dhe destabilizimi i vazhdueshëm i rajonit. Këto qarqe janë në shërbim të tezës se pavarësia e Kosovës do të destabilizojë Maqedoninë dhe shtetet fqinje.

Bashkimi Demokratik për Integrim apelon tek ish- ushtarët e UÇK-së këtu dhe në Kosovë, tek anëtarësia, dhe simpatizantët që të jenë konsekuentë në drejtim të realizimit të qëllimeve politike dhe të mos binë në grackat e skenareve që e pengojnë procesin jetësimit të Marrëveshjes së Ohrit dhe pavarësimit të Kosovës në rrugën drejt integrimit në NATO dhe Europës pa kufi.

Pas takimeve të vazhdueshme të Kryesisë me anëtarët e vet dhe takimet me faktorët relevantë ndërkombëtarë dhe shqyrtimit dhe analizave të situatës, Bashkimi Demokratik për Integrim kërkon:

- Grupi punues për menaxhimin e krizës të dalë me një raport të detajuar për ngjarjet në malësinë e Shkupit;

- Përgjegjësi konkrete nga ata që urdhëruan dhe udhëhoqën këto operacione ushtarako-policore jashtë konsultimeve të domosdoshme brenda qeverisë dhe me faktorin ndërkombëtar;

- Rishqyrtim të politikës pët integrimin e ish zonave të krizës

Me këtë rast, Bashkimi Demokratik për Integrim, si vazhdimësi e ish Ushtrisë Çlirimtare Kombëtare, si inicues i ndryshimeve dhe bartës i proceseve të jetësimit të tyre, apelon tek popullata që të ketë besim të plotë tek ne dhe të na përkrahë në rrugën drejt jetësimit të aspiratave të luftës.

09.09.2003
Tetovë
Ali Ahmeti
Kryetar i BDI -së